کیتابلار کیتابی

آچیقلاما

منیم ده الیمدن بو گلیر آنجاق...

کیتاب سئچ (کیتابلار کیتابی)نین سونوجو اوچون آچیقلاما

26 آذرده باشلاییب، 29 بهمنده سونوجلانان (کیتاب سئچ)، کیتابلار کیتابی سئچیمی ایلک گوندن ایستی و سرین یاناشمالارلا قارشیلانمیشدیر.

ایلک اؤنجه وورغولاماسی یئرینه دوشردی کی، بو ایشدن آماجیمیز سادهجه بیر سیرا کیتابلارا دَیر وئرمک و اونلارین ساتیشینا یاردیم ائتمک و بونونلا بئله یایین ائولرینه مالی جهتدن تبلیغی یاردیم و هابئله دَیرلی اثرلرین یارادیجیلارینی اوزه چکمک ایدی. سادالادیغیمیز هدفلرین آردیندان البته کی هر بیر اثری چالیشا چکمک و اونو گوندمه گتیریب چیخارماقلا یئنی تنقیدلرله اوزبه اوز ائتمک گؤیلوموزون آلت قاتیندا یئرلشیردی.

و اما بیزیم گؤیلوموزدن نه کئچیردیسه بو گون آرتیق (کیتابلار کیتابی) سونوجلانمیشدیر. بَری باشدان اعتراف ائتمهلییک کی، گؤیلوموزدن کئچن نتیجهلر اولدو دا! اولمادی دا!

کیتاب سئچین ایلک خبرینی وئبلاقلاردا و سیتهلرده و هابئله پوستر و اعلان چاپی ایله و بیر سیرا اوستادلارلا حضوری دانیشماقلا آرایا قویدوق. بو آرادا بیرینجی یاناشمالار چوخ ماراق دوغوران و گؤیلوموزجه اولموشدور. بوتون سیتهلر و ادبی وئبلاقلاردان ایمئل و کامئنت یولویلا خاهیش ائتدیک کی بو خبری ایشیقلاندیرسینلار و هابئله ایمئیل قروپلاریندا خبرلریمیزی یایدیق. و تاسوفله رسمی مطبوعات بو مساله ایله همیشه کی کیمی سایمازیانا سوووشدو و محلی مطبوعات دا هابئله!...

کیتاب سئچین اؤز رسمی وئبلاقی (www.kitasech.logfa.com) (یاشماق، بیرلیک، گونش) ادبی بدیعی درگیلرینین دستهیی ایله بو تشبوثو ایرهلی سورموشدولر.

بو آرادا بیر سیرا وئبلاقلارین اومیدینه قالان کیتاب! دونیاسی بیر سیرا اوخوجولار طرفیندن یاخشیجا قارشیلاندی و بیر سیرالاری طرفیندن ایسه... بعضی ادبی وئبلاقلار حتا بو خبری اؤز مجازی دونیالاریندا ایشیقلاندیرماقدان دا چکیندیلر!

نه ایسه کیتاب سئچ ایلک اؤنجه اؤز رسمی ژوری هئیتی و داها سونرا ایمئللرله گلن رای، خصوصی کامئنتلر و آچیق کامئنتلرله اؤز ایشینه داوام ائتدیردی. البته کی هامیسیندان اؤنملیسی، ژوری هئیتی (اؤز رسمی و امضالانمیش کاغیذ مکتوبلاریلا) اولمالییدی.

هر حالدا آچیق کامئنتلر آرتیق هامینین گؤز اؤنوندهدیر و خصوصی کامئنتلر بعضی یامان – یوووزدان قیراغا ماراقلی نقطه نظرلره گلیب چاتمیشدیر و ایمئللر ایسه ایضاحلی و مفصل بیر سئچیمه مالیک ایدیلر. بو آرادا بعضی انترنتله تانیش اولمایان و یا یئترینجه واختلاری اولمایان شخصلر (و بیر چوخ یاشلی ادبیاتچیلار) کاغیذ مکتوب اولاراق اؤز نظرلرینی یازمیش و کیتابلاری سئچمیشدیلر. بیر سیرا کیتاب سئورلر ایسه بلکه واختلارینین اولمادیغیندان مئساژ گؤندرمکله کیتابلاری سئچمیشلر. سادالادیغیمیز بوتون یازیلار، خصوصی ایله داورلرین رسمی و اؤز سیجیللی آدلارییلا امضالانمیش نتیجهلری، یاشلی و واختی دار اولان ادبیاتچیلارین مکتوبلاری، ایمئللر، خصوصی کامئنتلر، آچیق کامئنتلر و حتا مئساژلار دا آرشیولنمیش و بیر سند کیمی ساخلانمیشدیر.

آذربایجان مدنیتینین 21 قونوسوندا سئچیلهجک کیتابلار ( رومان - حیکایه - شعر - تاریخ - اوشاق ادبیاتی -طنز -کلاسیک و دیوان ادبیاتی (تحقیق و حاضیرلاما) - سؤزلوک - دوشونجه - آراشدیرما - قادینلار - آشیق ادبیاتی -دینی کیتابلار - موسیقی - چئویرمه - کؤچورمه - قرافیک و دیزاین (جیلد و صفحه آرایی) - یایین ائولری - مطبوعات - اؤیرنجی درگیلری-اَن پیس کیتاب!)ین بیرینجی مرحلهسی "کیتاب سئچ" وئبلاقیندا سئچیلدیکدن سونرا، اجرایی هئیت بوتون رایلر و نظرلرین سونوجونو داورلرین اختیاریندا قویموش و بو آرادا داورلرین، بعضی او گونه کیمی گؤرمهدیی کیتابلار و وئبلاقدا یئترینجه سس قازانمیش اثرلر ایسه حاضیرلانیب(کیتاب ساتیش ائولریندن آلینیب)، ژوری هئیته تسلیم اولوندو.

هر حالدا سونوج، اعلان اولوندوغو کیمی گؤز اؤنوندهدیر. تکجه بعضی ایضاح اولوناسی چاتیشمامازلیقلار و آچیقلانماسی گرکن قارامتیل نقطهلر نظره گلیر.

صیفیر: کیتابلار کیتابی (سون بئش ایلده آذربایجاندا یایینلانمیش کیتاب سئچیمی) سایین کیتاب یارادیجیلاری باشدا اولماقلا، بوتون کیتاب یایین و ساتیش ائولرینه سونسوز حؤرمتله، بوتون عؤمرونو کیتابچیلیق یولوندا قویان و بو یولدا جانینی فدا ائدن، رحمتلیک سایین (هلال ناصری)نی دوشونرکن، فستیوال او قوجامان کیتاب عاشیقینین یادی و آدی ایله تقدیم اولونموشدور.

(گؤرهسن کیمدی بو کیتابلاریمیزین قاچاق نبیسی و قوچاق نبیسی؟

سئویملی اوخوجولار (هلال ناصری)نی تانیتدیرماغا، هئچ اولماسا بیر–ایکی سطیر کامئنت یازین بیزه...)

بیر: بیزیم ده الیمیزدن بو گلیردی آنجاق...

ایکی: کیتاب سئچده اشتراک ائتمک حاققی، آنجاق، سون بئش ایلده آذربایجاندا یایینلانمیش اثرلره وئریلمیشدیر. دئمک اؤتن ایللرده و حال حاضیردا کیتاب ساتیش ائولرینده ساتیشا قویولان و اوخوجولارین ماراغینی قازانان کیتابلار نظرده توتولموش. کیتابلارین سیجیللی صحیفهسینده یازیلدیغی کیمی بعضی باشقا یئرلرده چاپ اولان اثرلر و یا یئترینجه یاییملانمایان(پخش) اثرلر و هابئله دوستیانا پایلانان کیتابلار و اوخوجولارین و داها دوغروسو کیتاب ساتیش ائولرینین رفلرینده اولمایان اثرلر بو سئچیمدندن قیراغا قویولموشدور. (طبیعی کی بیر سیرا دَیرلی کیتابلاری بیز و داورلر و حتا پروفسیونال کیتابچی و کیتاب اوخوجولاری دا بو گونه کیمی زیارت ائتمهیه نایل اولمامیشلار.)

اوچ: سئچیلن اثرلر (داورلر و اوخوجولار طرفیندن) کسگین سس (رای) ایله سئچیلمیشدیر و حتی بعضی گوجسوزلویو وورغولانان اثرلر ده بو نتیجهنین ایچریسینده اولا بیلر. (دئمک، بلکه دموکراسینین بو نقطهسی دموکراتیک دئییل!!!)

دؤرد: بیر مسالهنین وورغولاماسینی چوخ اؤنملی گؤروروک: کیتاب سئچ، کیتابلار کیتابی سئچمک نییتی ایله قورولموشدور. دئمک (یارادیجی، شاعیر و یازار سئچمک فیکرینده دئییلدیک). ایلک اعلاندا دئییلدییی کیمی، اثرلر تکجه ادبی و بدیعی باخیمدان دئییل، بلکه (املا-اورتوگرافی، ائدیت، فونت، دیزاین-صفحه آرایی، گرافیک(جیلد)، تیراژ، چاپ کیفییتی، صحافی، یاییم(پخش)، یایین(نشر) کیفییتی، تنقید (دئمک اثرین نه قدر تنقید اولونماسی و اثر یارادیجیسینین تپکی گؤسترمهسی حتا)، اثرین تبلیغی و تبلیغی یوللاری بیله و سونرا اثرین پروفسیوناللیغی، قایناغی، اتک یازیسی بیله، آدی و سیجیللیسی ده بیزده اؤنم داشییردی. بونا باخمایاراق کی سون سؤزو اثرین اؤزو (سبک، دیل، ساختار، چاغداشلیق...)، جمله قورولوشو، وو غو، چالار، سؤزجوک داغارجیغی و دیلین استاندارد و یا معیارلیغی و ... دئیهجکدیر. و ائله محض اونا گؤره ده ایلک باخیمدا سونوجدا گویا بعضی چاتیشمامازلیقلار نظره گلیر.

بئش: حیکایه دئدیکده، بوتون (رومان و پووئست)دن کیچیک یازیلان حیکایه-اؤیکو (داستان کوتاه) و فلاشفیکشن، مینی مال و باشقالارینی بیر یئرده، بیر قونو کیمی نظرده توتموشدوق. (سئچیلن اثرلر ده بئلهجه سئچیلمیشدیر)

آلتی: بوتون اثرلرین آذربایجان مدنیتینه عاید اولدوغونا باخمایاراق، دیل نقطهی نظریندن فارسجا و تورکجه سئچیلمیشدیر. و البته رومان، حیکایه و گرافیک قونوسوندا دا سئچیلن اثرلر بو ندندن آسیلیدیر. (البته تاریخ، آراشدیرما، دوشونجه و ... قونولاریندا دا بیر چوخ اثرلر ایکی دیللی نشر اولموشلار)

یئددی: قید اولونان قونولاردان قیراغدا گلن اثرلر، تاریخی بئش ایلدن چوخ اولان و هابئله خاریجده چاپ اولان و یا کیتابا بنزهمهین (جزوهیه بنزهین) اثرلر، باشقا یؤندن ایسه دوغما تورکجهمیزی تورکیه تورکجهسینه اوخشادیلان و یا فارسجانین جمله قورولوشو ایله تورکجه یازیلان اثرلر ایلک نؤبهده قیراغا قویولموشدور.

سکگیز: بوتون قونولاردان داها آرتیق اؤنم داشییان و البته کسینلیکله سس قازانماییب و قیراغا قویولان "اوشاق ادبیاتی" قونوسو، نتیجه اعلان اولدوقدان سونرا بیر چوخ موباحیثهلرین موضوعسو اولموشدور.

اوخوجولارین(کامئنت-ایمئیل) و اجرایی هئیتین سئچدییی اثرلر نتیجهنین سونوندا وئریلمیشدیر. و اما داورلر، اوشاق کیتابلارینین، دونیا اوشاق کیتابینین استانداردلاریندان اوزاق اولماسینا گؤره هئچ بیر اثره کسگین رای وئرمهمیشدیر. نمونه اولاراق بعضی اثرلرین دَیرلی اولماسینا رغمن، پوزقون بیر رسم(نقاشی)، چاپ و (صفحه آرایی)یه مالیکایدیلر. و بعضی اثرلرین ایسه یاخشی اوشاقسئور رسمی (نقاشی)سی اولدوغو حالدا ضعیف بیر متنله (و یا اوشاغا دخلی اولمایان متن و یا اومیدسیز شعرلر و ناغیللارلا و هابئله قارماقاریشیق بیر دیل ایله) اوشاقلارا سیرینمیشدی. (مشدی عیبادین تاریخ نادری کیتابی احوال-روحیهسینده...)

هر حالدا اوخوجولارین دا کامئنتلریندن اوج-بوجاغی بللی اولان کیمی، استاندارد اوشاق کیتابیمیز یوخدور دئسک یانیلمامیشیق. اوشاق کیتابلارینی بیر داها دا نظردن کئچیرسک، داها آرتیق بو فاجعهنین دوغرولوغونو باشا دوشمهیه مجبور اولاریق.

دونیادا اوشاق کیتابی (متن+نقاشی+چاپ کیفییتی) ایله اؤلچولور. دئمک بیزده هئچ بیری و یا اَن آزی ایکیسی یوخدور!

اوشاق ادبیاتیندا ایمئیللردن گلن سسلر، نتیجهده اونودولموشدور و بعضی کیتابلار او جملهدن (بیر ایکی بیزیمکی – جیرتدان – هپیریم هوپوروم ) تاسسوفله لحاظ ائدیلمهمیشدیر.

دوققوز: رومان و حیکایه قونولاریندا، جیددی بیر یانلیشلیق اساسیندا و داها دوغروسو اجرایی هئیتین بیر اؤیهسینین چاپ تاریخی یادداشتینین دَییشیک یازماسینا گؤره ایکی دَیرلی اثر (منیم آدلاریم /رومان/صالح عطایی و دون کیشوت ... / حیکایه توپلوسو/ صالح عطایی) اوخوجولار طرفیندن سئچیلمیشسه ده، تمامیله رایلرین داورلره تاپشیریلدیغی واختدا قیراغا قویولموشدور. بو ایکی اثرین سئونلری و یارادیجیلاریندان(یازیچی-ناشیر-گرافیست) بؤیوک اوتانجلا باغیش دیلهییریک. اونسوز دا اونلار اورَییمیزه حک اولموشلار...

اون: مطبوعات قونوسوندا (دیلماج – آذری – یارپاق) ان چوخ سسلری قازانمیشدیلار. و هابئله اونلارلا بیرگه (یاشماق) ژورنالی دا دیلماجلا برابر رای گتیرمیشدی. آمما او اوچ نشریهنین داها نشر اولونماماسی و باغلانماسی اوچون، آدلاری، سئچیلمیشلر سیراسیندان قیراغا قویولموشدو. کیتاب سئچین اساسنامهسینه اساسن چاپ اولمایان و یا باغلانان نشریهلر بو سئچیمده یئر توتا بیلمز.

اونبیر: بعضی اثرلرده، یانلیش اولارق کیملرینسه دفعهلرله رای گؤندرمهلری، ژوری هئیتی و اجرایی هئیتی آزدیرا دا بیلمیش اولار.

سئچیلن اثرلردن قیراغا، یاخشی سس قازانان اثرلرین لیستی ده چیخاریلیب، کیتاب اوخوجولارینین دیققتینه چاتدیریلماسی ماراقلی اولا بیلر.

ان پیس کیتاب قونوسودا ایسه ماراقلی و البته جنجال دوغوران آدلار ثبت اولموشدور. دئمهلی بیزده ده! پیس! کیتابلار! چاپا وئریلیرمیش. هئچ اینانماق اولمور...

(دوغرودان اوخوجو بَی، داوا-دالاشمایلا نئجهسن؟... سن نئجه تنقیدچی! جناب؟...

ژورنالیستلر؟... و داها اؤنملی اولان وئبلاق یازارلاری؟... نئیلهمهلییک؟؟؟

گولشمهیه بیر مئیدان آچین لوطفن...

قیساجا گیلئیگوزار...

1. ایلک اؤنجه دئمهلییک کی، هر کیمسه، بیر ده بئله بیر ایش(هر نؤوعوندن سئچیم...) گؤرمک ایستهییرسه ال ساخلاسین، حامماللیغینا، نه بیلیم نه سؤیوشونه کیمی بیر شئیلره و سوناوجو دئپرئسلییینه دَیمز. بو گونکو دونیادا ائله بئله ده؟!.........

2. گیلئی کیمه دوشرکی؟ آمما بیزه به-به دئییب، آرخامیزدان ایتهلهییب، گئدین گلیریک دئیین و نهایت بیر قورو کامئنت ده یازمایان و اَن آزی بیر سؤیوش یازمایان دوستلار ساغولون... سیزینله گئدهجکدیک اورالارا !؟... یوخ باغیشلایین بیز... !!! سیزه اینانماق فاجعهیمیش دئمه!.. لوطفن بیر آز شعار قوسون تپهمیزه... مئرسی بَیلر...

3. بیر ده عاییب اولماسین، سایین وئبلاقلار و اینترنئتلیلر، یادینیزدادیرسا دفعهلرله خبر گؤندردیک و حتا خبر کامئنتی قویدوق، یالوارماغا دا دوشدوق. دئمهلی سئکسووال سئوگی مکتوبو دا اولمادیق باری. سیزین وئبینیزده یوکلنمهیه هانسی مدنی، ادبی، بدیعی ایش گرکدیر سایین ضیالیلار... کاش بیرینیزین قیز دوستو اولوردوق!!!

+یازیلدی 87/12/15ساعات7:35 PMتوسط یازارلار قروپو |