کیتابلار کیتابی

اقرا بسم ربک الذی خلق

سئویملی اوخوجولار، سیز سون ایللرده و سون آیلاردا هانسی کیتابلاری اوخویوبسوز؟

هانسی کیتابلاردان خوشوز گلیب؟ اونلاری سئویبسیز و اونلارلا یاشاییبسینیز؟

هانسی اثری ، کیتابلار کیتابی سئچه بیلرسینیز؟...

اَیری اوتوراق دوز دانیشاق، هئچ سئودییینیز کیتاب اولوبدو؟ دئمهلی عاشیق اولوبسونوز بیر کیتابدا؟ داها دوغروسو هئچ کیتاب اوخویورسوز؟...

بیزده کیتاب دورومو او قدر فاجیعهلیدیرکی...

کیتاب چاپی، کیفییت و کمییتجه آغلامالی دورومدادیر.

کیتاب ساتیشی پهلوی رژیمینین 26 آذر گونونده کیتاب یاندیرماسی کیمی فاجیعهیه بنزهییر...

هله بوندان دا یئکه-یئکه دانیشماق اولار کیتاب قونوسوندا!

آمما بیز سادهجه اَن یاخشی و دَیرلی کیتابلاری سئچمک قرارینا گلمیشیک.

بو کیتابلاری سئچمکده هدفیمیزسه، بو قارماقاریشیق بازارلیق دونیاسیندا یاخشی کیتابا و اونون آردینجا یاخشی یازیچی و یارادیجییا دَیر وئرمکدیر.

بو آرادا هر حالدا بیر سیرا کیتابلار چاپ اولماقدادی، اونلارین ان یاخشیسینی تانیتدیرماق و اونلارین ساتیشینا یاردیمچی اولماق نییتیندهییک.

بوتون دونیادا کیتاب اوخوما مدنییتینی داها گوجلندیریب، گوندملشدیرمک رسمی دایرهلرین گؤرهویدیر، بیزده کیمین بوینونادیر؟...

بو کیتاب سئچیمینین داورلرییله بئله بیر قرارا گلینیب کی، بو سئچیمده تکجه اثرلرین متنی دئییل، بلکه متندن باشقا ( پاراتئکست) دئییلن قونویا دا دقت ائدیلسین. هر بیر اثرین گرامر، اورتوقرافی، دیزاین، قرافیک و بدیعیلییی ده بیزی ماراقلاندیریر. متندن، ایملادان، قرافیکدن و جمله قورولوشوندان قیراغا حتّا، هر بیر اثرین سیجیللیسینین یازیلیشی و هر بیر اثرین یازیلیش فونتو و ائدیت و رئداکتهسی ده (ویراستاری) بیزیم نظر دققتیمیزی چکهجکدیر.

سیز ایسه بیزیم داورلرین بیری کیمی سئودییینیز کیتابی بیزه تانیتدیرا بیلرسینیز. رسمی داورلر اؤز سئودیکلری اثرلری سئچیب، مکتوب اولاراق بیزه چاتدیراجاقلار. سیز ایسه بَیهندییینیز کیتابلاری (کیتاب سئچ) وئبلاقیندا کامئنتلرله و یا ایمئیل یولو ایله و ال یازما مکتوب و یاخینیندان دانیشیق یولو ایله بیزه چاتدیرا بیلرسینیز. هر قونودا اوچ کیتاب سئچیلمه لیدیر.

بو سئچیمی هر ایل 26 آذر کیتاب گونوندن باشلایاراق، 29 بهمن گونو سونوجلایاجاغیق.

سئچگین کیتابلارین قونولاری بونلاردان عیبارت اولاجاقدیر.

رومان - حیکایه - شعر - تاریخ - اوشاق ادبیاتی -طنز -کلاسیک و دیوان ادبیاتی (تحقیق و حاضیرلاما) - سؤزلوک - دوشونجه - آراشدیرما - قادینلار - آشیق ادبیاتی -دینی کیتابلار - موسیقی - چئویرمه - کؤچورمه - قرافیک و دیزاین (جیلد و صفحه آرایی) - یایین ائولری - مطبوعات - اؤیرنجی درگیلری-اَن پیس کیتاب!

www.Kitabsech.blogfa.com

kitabsech@gmail.com

کیتابلار کیتابی سئچیمینین اجرا هئیتی

یاشماق درگیسی

بیرلیک درگیسی

گونش درگیسی

+یازیلدی 87/09/30ساعات6:28 PMتوسط یازارلار قروپو |